بعد تراجعها عن الظهور بالفيديو لجمهورها لتأكيد تعافيها نهائياً من الإدمان، وجهت المطربة شيرين عبد الوهاب عدة رسائل إلى جمهورها، كانت أُوْلَاها تأكيد عدم صحة الصورة المتداولة لها برفقة زوجها السابق حسام حبيب، مؤكدة أنها لم تغادر المصحة النفسية برفقته كما روَّج البعض.
وقال الإعلامي عمرو أديب، إنه اتصل بالفنانة شيرين عبد الوهاب ليطمئن على صحتها، وحاول الحصول على مداخلة هاتفية منها للبرنامج، ولكنها اعتذرت مؤقتاً، وطالبته بتوصيل عدة رسائل لكل جمهورها ومحبيها والزملاء من داخل الوسط الفني المصري والعربي.
وأضاف الإعلامي عمرو أديب ببرنامج الحكاية: «يهمني شيرين تبقى كويسة أكتر من الشغل، لما كلمتها كانت بتضحك وعندها تقدير لكل اللي وقفوا جنبها، وهي ست قوية وقادرة تتخطى اللي حصل».
ونقل أديب عن شيرين: «أبلغكوا إن الصورة اللي ليها مع حسام حبيب لا أساس لها من الصحة»، وقال: «صوتها كان كويس وأحسن، وإن شاء الله نشوفها في حفلات قريب، وهي مطربة العالم العربي، وبنفتخر بشيرين زي ما بنفتخر بكل نجوم الوطن العربي».
وأكمل عمرو أديب: «هتسمعوا صوتها قريب، ومعرفتي إن الناس اللي بتتعالج بهذا الشكل بياخدوا وقت، ومبيرجعوش 100% على طول، ونتمنى ترجعلنا جميعاً».
وعقب أديب، على رسائل شيرين قائلاً: «هي دي شيرين اللي أنا عارفها.. هادية وجميلة وبتضحك وبتنكت وعندها وَحشة للوسط الغنائي وتقدير لكل اللي وقف جمبها واللي سأل علهيا.. شيرين ست قوية وقادرة تتخطى اللي فيه».
وسبق أن كشف محامي الفنانة شيرين عبد الوهاب، تفاصيل حالتها الصحية وحقيقة الصورة المنتشرة لها رفقة حسام حبيب، إلى جانب حقيقة إدمانها المخدرات، وقال إن شيرين لم تخرج من المستشفى برفقة طليقها الفنان حسام حبيب، كما أُشيع خلال الساعات الماضية، موضحاً: «شيرين مخرجتش مع حسام حبيب، وكل الصور دي قديمة، وهي هتستريح شوية، وإن شاء الله في القريب العاجل هيكون فيه فيديو مصور ليها هيوضح كل حاجة».
وأكد أن شيرين عبد الوهاب، خرجت من المستشفى بتقرير من مجلس الصحة النفسية، موضحاً: «شيرين بصحة جيدة وطلع تقرير من مجلس الصحة النفسية إنها لا تستلزم العلاج الإلزامي، وبناءً عليه خرجناها النهاردة من المستشفى ورجعت بيتها، وشيرين كانت قبل ما تدخل المستشفى بأسبوع كانت عاملة حادثة كبيرة والآن حالتها الصحية تسمح لها بمزاولة حياتها الطبيعية، وهي لو تعبانة مكنش هيطلع تقرير من مجلس الصحة النفسية إنها تطلع فوراً».
وأضاف محامي شيرين عبد الوهاب: «إحنا طول الوقت بنتعرض لحملة مدفوعة وموجهة بتشكك في شيرين ومرض شيرين ومحامي شيرين، ولكن الحمد لله كل حاجة ظهرت للرأي العام وخرجت لبيتها بالسلامة، وهي الفترة اللي جاية هتكون مركزة في شغلها وحياتها الفنية ومفيش أكتر من كده».
واختتم حديثه قائلاً: «أنا حاولت أدخل المستشفى بصفة ودية لأن وجودها في المستشفى بقى اختياري وليس إجباري، ومن حق أي حد إنه يزورها ولكن إحنا مُنعنا من الدخول، وهي طلبت مني إني أنشر التسجيل الصوتي ده، علشان الناس اللي بتثير الشكوك، وبناءً عليه صدر القرار وخرجت لبيتها».
